الثلاثاء, 07 ابريل, 2009
هاني الجزيري فنان شاب لمع بريقه وتنباء له العديد بالتألق منذ زمن ولكن الي الان لم نراه في سماء الشهره يتألق كما توقعنا فما السبب .. التقيت به وكانني اراه امامي منذ ان كان في الرابعه عشر من عمره وسألته
هاني انت فين ؟
انا موجود الحمد لله
ليه لسه ماشفنالكش حاجه لا علي شاشه السينما ولا في التلفزيون؟
الله المعين واكيد اللي كاتبه ربنا هيكون
تفتكر في حد مش عايزك تظهر؟
الله اعلم بس هقول لحضرتك حاجه انا كل ده مايهمنيش لاني علمت ان رزقي لن ياخذه غيري فاطمئن قلبي وبعدين انا الحمد لله ماليش اعداء
نسيت اسالك زمان.. مين بتحب تقراله بما انك مؤلف؟
انا بعشق نجيب محفوظ ويسري الجندي انا بعتبر عم نجيب الله يرحمه مثلي الاعلي والاستاذ يسري هو عمي واستاذي
مين وقف جنبك ومين خذلك ؟
ان كان علي اللي خذلوني فالله يسامحهم وانا مش هقدر اتكلم عنهم اما اللي وقفوا جنبي فانا بقول بجد انه كان الاستاذ اسامه الزغبي المنتج احتضني بجد والراجل عاملني زي ابنه وعمري ما حسيت معاه اني صغير بل بالعكس حسسني اني فنان وكان بيشجعني ويثني عليا وانا بشكره جد وجميله هيفضل في رقبتي طول العمر وكمان مانساش الاستاذ الكبير المخرج نبيل عبد النعيم اللي تشرفت اني عملت تحت ايده و بالرغم من انه كان بيقسوا عليا الا انه علمني كتير
كان بيقسوا عليك ازاي ؟
يعني لما كنت اكتب حاجه مش حلوه كان بيقولي انها مش حلوه ووحشه ماكانش بيجاملني صراحه كنت الاول بزعل لكن بعد كده اكتشفت انه علمني كتير وكمان كان شرف ليا اني اتعامل معاه وانا بشكره
نفسك في ايه ؟
نفسي اقدم مسلسل في رمضان يحمل اسمي ويكون عباره عن ملحمه يخرجها الاستاذ احمد صقر ويألف اغانيها عمنا عبد الرحمن الابنودي ويلعب بطولتها يحي الفخراني ويكون مدير تصويرها الاستاذ طارق التلمساني ويغني اغانيها محمد منير
ايه الكلمه اللي تحب تقولها لكل اللي هيقرا الكلام ده؟
اقوله ادعيلي وانا بدعي ربنا سبحانه وتعالي بانه يوفق كل مجتهد امين يارب العالمين
هاني انا بشكرك جدا واقبل ما انهي معاك الحوار احب اهنيك علي الكرنك واتمني اشوف حاجه زيها
بأذن الله
أضف تعليقا
أضف تعليقا
<<الصفحة الرئيسية